Konstitutsiyaviy sud huquqbuzarlarni prokuror sanksiyasi bilan 10 sutkagacha ushlab turish tartibini Bosh qonunga zid deb topdi
Sudning 22-sentabrdagi qaroriga ko‘ra, shaxsini tasdiqlovchi hujjatlari bo‘lmagan fuqarolarni huquqbuzarlik holatlarini aniqlash vaji bilan prokuror sanksiyasi asosida 10 sutkagacha ushlab turish tartibi Konstitutsiyaning 27-moddasi uchinchi qismiga zid keladi. Amaldagi tartibga ko‘ra, shaxsni aniqlash jarayonida fuqaro dastlab 3 sutkagacha, hujjatlari bo‘lmagan taqdirda esa prokuror ruxsati bilan 10 sutkagacha ushlab turilishi ko‘zda tutilgan edi.
Ushbu huquqiy norma Oliy Majlisning Inson huquqlari bo‘yicha vakili – Ombudsman murojaati asosida atroflicha o‘rganib chiqildi. Ko‘rib chiqish natijalariga ko‘ra, shaxsiy daxlsizlik va erkinlik huquqlarini ta’minlash borasidagi inson huquqlari kafolatlari ustuvor deb topildi.
Konstitutsiyaviy sud qarori e’lon qilingan paytdan e’tiboran qat’iy kuchga kiradi va ma’muriy amaliyotda ushbu normadan foydalanish to‘xtatiladi. Shuningdek, tegishli qonun hujjatlarini Konstitutsiyaga muvofiqlashtirish bo‘yicha parlamentga tegishli ko‘rsatmalar beriladi.
