Kam ta’minlanganlarga xususiy bog‘cha va o‘quv markazlari xarajatlari vaucher orqali qoplab beriladi
Yangi tartibga muvofiq, Ijtimoiy himoya milliy agentligiga yil yakuniga qadar ehtiyojmandlarni reyestrga kiritish mezonlarini tubdan qayta ko‘rib chiqish vazifasi yuklatildi. Endilikda oilaning ijtimoiy holatini aniqlashda faqat uning rasmiy daromadiga tayanib qolinmaydi. Xonadondagi surunkali xastaliklar, nogironlik holati, ko‘p bolalilik hamda oila a’zolarining xorijda mehnat qilayotgani kabi qator omillar ham inobatga olinadi.
Yig‘ilishda mamlakatda kambag‘allik darajasi 3,9 foizga tushgani, lekin 3 yoshgacha farzandi bor oilalarda bu ko‘rsatkich 6,5 foiz atrofida saqlanib qolayotgani ta’kidlandi. Shu munosabat bilan yosh bolali onalarni uyda yoki mahallada ish bilan ta’minlash va ularga daromad manbayi yaratish tizimi yo‘lga qo‘yiladi. Ishlaydigan onalarga esa bola bir yoshga to‘lguniga qadar Ijtimoiy sug‘urta jamg‘armasidan muntazam nafaqa ajratib boriladi.
Eng muhim yangiliklardan biri kelasi yildan kuchga kiradi. Ijtimoiy reyestrga kiritilgan oilalar farzandlarining davlat va xususiy bog‘cha badallari, nodavlat o‘quv markazlari to‘lovi, jamoat transporti yo‘lkirasi hamda oliygoh yotoqxonasi xarajatlari 12 oylik vaucherlar orqali qoplanadi. E’tiborlisi, ushbu vaucherlar oila reyestrdan chiqarilgan taqdirda ham o‘z kuchida qoladi. Mehnatga layoqatsiz oilalarga "passiv daromad" keltiruvchi ijtimoiy paketlar uchun esa joriy yilning o‘zida 300 milliard so‘m yo‘naltirildi.
