Jizzaxda 3 nafar qiz sun’iy suv hovuzida cho‘kib ketdi
Joriy yilning 17 iyul kuni Jizzax viloyatining Mirzacho‘l tumanida 14, 16 va 17 yoshdagi qizlar sun‘iy suv hovuzida cho’kib, halok bo‘ldi. Bu haqda Bosh prokuratura matbuot kotibi Hayot SHamsutdinov Portal24’ga ma’lum qildi.
Qayd etildiki, holat soat 13:00 larda Paxtazor mahallasida sodir bo‘lgan. Hududda faoliyat yuritib kelayotgan “Mulla-Buloq” fermer xo‘jaligi yer maydonida tomchilatib sug‘orish uchun qazilgan sun’iy hovuziga 3 nafar voyaga yetmagan qizlar cho‘milish uchun tushgan va cho‘kib, vafot etgan.
Ularning o‘limi sababini aniqlash maqsadida sud-tibbiy ekspertizasidan o‘tkazilgan. Sud-tibbiy ekspertizaning tuman filiali birlamchi xulosasiga ko‘ra, qizlarning o‘limiga yuqori nafas yo‘llarining suyuqlik suv bilan berkilishi natijasida mexanik asfeksiya sabab bo‘lgan.
Hozirda mazkur holat yuzasidan Mirzacho‘l tuman prokuraturasi tomonidan tergovga qadar tekshiruv harakatlari olib borilmoqda.
