Jazirama issiqda ishlashdan bosh tortish intizom buzilishi hisoblanmaydi – Mehnat inspeksiyasi
Jazirama issiqda uzoq vaqt ishlash issiq urishi, suvsizlanish va organizm qizib ketishi kabi og‘ir oqibatlarga olib kelishi mumkin. Shu sababli Mehnat inspeksiyasi ish beruvchilarga ish vaqtini kunning salqin mahalliga ko‘chirish, qo‘shimcha tanaffuslar ajratish hamda xodimlarni suv va salqin dam olish joylari bilan ta’minlashni tavsiya etmoqda.
Mehnat kodeksining 358-moddasiga muvofiq, agar ish sharoiti xodimning hayoti va sog‘lig‘iga bevosita xavf tug‘dirsa, u ish beruvchini ogohlantirgan holda vazifani bajarishni rad etishi mumkin. Bu holat mehnat intizomini buzish sifatida baholanmaydi. Inspeksiya barcha tashkilotlarni sanitariya-gigiyena me’yorlari hamda Mehnat kodeksining 359-moddasi talablariga qat’iy rioya qilishga chaqirmoqda.
