Istanbulda ikki o‘zbekistonlik ayol qotiliga ikki martadan og‘irlashtirilgan umrbod qamoq jazosi berildi
Istanbulning Umraniya tumanidagi jinoyat ishlari bo‘yicha sudida 36 yoshli Durdona Hakimova va 32 yoshli Sayyora Ergashaliyevaning o‘limi yuzasidan 11-sentyabr kuni so‘nggi sud majlisi bo‘lib o‘tdi. Qotillikni sodir etganlikda ayblangan 31 yoshli Dilshod Turdimurotov hamda 29 yoshli G‘ofurjon Kamolxo‘jayev sud zalida aybdor deb topildi.
Sud hukmiga ko‘ra, har ikki sudlanuvchi o‘ta shafqatsizlik va vahshiylik bilan odam o‘ldirish jinoyatini sodir etgani uchun ularning har biriga alohida-alohida ikki martadan og‘irlashtirilgan umrbod qamoq jazosi tayinlandi. Bundan tashqari, marhumlarning o‘limidan foydalanib ularning mol-mulkini o‘zlashtirganlik, ya’ni turar joyda o‘g‘rilik qilganlik ayblovi bo‘yicha har ikki ayblanuvchiga yana 14 yildan ozodlikdan mahrum etish jazosi belgilandi.
Eslatib o‘tamiz, ushbu mudhish voqea 2026-yilning yanvar oyida sodir bo‘lgan edi. Gumonlanuvchilar ayollarning jasadlarini bo‘laklarga ajratib, shahar bo‘ylab chiqindi konteynerlariga tashlab yuborgan hamda mamlakatdan qochib ketishga urinayotganda Istanbul aeroportida qo‘lga olingan.
