Ish haqi 7,6 million so‘mgacha bo‘lgan fuqarolarning pensiya jamg‘armasiga davlatdan 2,5% qo‘shib beriladi
Prezident ishtirokida o‘tgan yig‘ilishda amaldagi jamg‘arib boriladigan pensiya tizimi tahlil qilinib, uni isloh qilish zarurligi ta’kidlandi. Hozirgi kunda fuqarolarning jamg‘arib boriladigan pensiya hisobvarag‘iga ish haqining atigi 0,1 foizi o‘tkazilmoqda.
Ushbu mablag‘lar bo‘yicha yillik daromadlilik 10 foizni tashkil etadi, bu esa bank omonatlari daromadligidan deyarli ikki barobar kamdir.
Shu munosabat bilan, yangi taklifga ko‘ra, agar ish haqi 7,6 million so‘mgacha (BHMning 15 baravari) bo‘lgan fuqaro o‘z daromadining 5 foizini jamg‘arib boriladigan pensiya hisobvarag‘iga o‘tkazsa, davlat ushbu hisob raqamga qo‘shimcha ravishda yana 2,5 foiz mablag‘ yo‘naltiradi.
Ish haqi 7,6 million so‘mdan yuqori bo‘lgan fuqarolar uchun esa ular to‘lagan ijtimoiy soliqning 1 foizini jamg‘arib boriladigan pensiya hisobvarag‘iga o‘tkazish ko‘zda tutilgan. Shuningdek, islohot doirasida xorijiy tajriba asosida xususiy va korporativ pensiya tizimlarini rivojlantirish rejalashtirilmoqda.
