Ikki qurilish kompaniyasi elektron ro‘yxatga kiritilmagan turar joylarni reklama qilgani uchun jarimaga tortildi
Reklama qonunchiligi talablarini buzgan Elita Stroy Building va Glamur Gold qurilish kompaniyalari Raqobat qo‘mitasi tomonidan moliyaviy jarimaga tortildi. Bu haqda qo‘mita matbuot xizmati xabar qildi.
Ma’lum qilindiki, davlat rahbarining 2020-yil 27-maydagi PQ-4732-son qarori bilan tasdiqlangan Ko‘p kvartirali uylarni ulush kiritish asosida qurish to‘g‘risidagi nizomga muvofiq, Ulush kiritish asosida qurish uchun mablag‘larni jalb etuvchi quruvchilarning elektron ro‘yxatiga kiritmagan holda qurilish obyektlarini reklama qilish taqiqlanadi.
Qo‘mitasi ushbu qaror doirasida o‘tkazgan o‘rganishlarda Elita Stroy Building va Glamur Gold qurilish kompaniyalarining turar joy majmualari elektron ro‘yxatga kiritilmagani, shunga qaramay, ular ijtimoiy tarmoqlarda reklama qilib kelinayotgani aniqlangan.
“Reklama to‘g‘risida"gi qonunning 16-moddasiga muvofiq, ishlab chiqarilishi yoki realizatsiya qilinishi qonunda taqiqlangan tovarlarni, shuningdek, ishlab chiqarilishi va (yoki) realizatsiya qilinishi uchun tegishli sertifikatlari va litsenziyalari, majburiy sertifikatlashtirish guvohnomalari yoki maxsus ruxsatnomalari mavjud bo‘lmagan tovarlarni reklama qilishga yo‘l qo‘yilmaydi.
Raqobat qo‘mitasining Maxsus komissiyasi har ikki kompaniyani qonun buzilishiga yo‘l qo‘ygan deb topib, ularga nisbatan belgilangan tartibda moliyaviy jarima qo‘llash to‘g‘risida qaror qabul qildi. Bundan tashqari, kompaniyalarga qonunbuzilish holatini to‘xtatish va bunday holatlarni kelgusida takrorlamaslik bo‘yicha ko‘rsatma berildi.
