Hujjatlarini yo‘qotganlik uchun jarima solish tartibi bekor qilinishi kutilmoqda
Prezidentning 15-iyuldagi “Aholiga ko‘rsatilayotgan davlat xizmatlarini takomillashtirish hamda fuqarolar uchun qo‘shimcha qulayliklar yaratish chora-tadbirlari to‘g‘risida”gi qaroriga ko‘ra, tegishli vazirliklarga 2026-yil oktyabriga qadar yangi tartib bo‘yicha takliflar kiritish topshirildi.
Unga muvofiq, ID-karta, ichki yoki xorijga chiqish pasportini yo‘qotgan yoki yaroqsiz holga keltirgan fuqarolarga nisbatan ma’muriy bayonnoma rasmiylashtirilmaydi. Buning o‘rniga yangi hujjatni rasmiylashtirishda qo‘shimcha davlat boji to‘lash tizimi yo‘lga qo‘yiladi. Amaldagi tartibga ko‘ra, ushbu qoidabuzarlik uchun BHMning yarim baravaridan uch baravarigacha miqdorda jarima qo‘llanib kelinayotgan edi.
Shuningdek, ushbu qaror bilan 2026-yil 1-noyabrdan boshlab fuqarolarga ruxsatsiz reklama SMS-xabarlari yuborish taqiqlanadi hamda taqiq yoki xatlov qo‘yilgan uy-joylarga garovga oluvchining roziligisiz yashash va doimiy ro‘yxatdan o‘tishga ruxsat beriladi.
