Harbiy xizmatga chaqiriluvchilar majburiy giyohvandlik testidan o‘tkaziladi
Adliya vazirligi tomonidan 2026-yil 14-sentyabr kuni tegishli idoraviy hujjat davlat ro‘yxatidan o‘tkazildi. Yangi tartibga ko‘ra, chaqiriluvchilar orasida giyohvandlik vositalarini iste’mol qilish holatlarini erta aniqlash maqsadida barcha ko‘riklar Respublika sud-tibbiy ekspertiza ilmiy-amaliy markazi hamda uning hududiy filiallarida amalga oshiriladi.
Tekshiruvlar harbiy xizmat turiga qarab bosqichma-bosqich tashkil etiladi. Xususan, muddatli harbiy xizmatga chaqiriluvchilar hududiy harbiy-tibbiy komissiyaga yuborilishidan avval, kontrakt bo‘yicha xizmatga topshirayotgan nomzodlar esa harbiy-tibbiy muassasada ko‘rikdan o‘tishdan oldin mazkur maxsus tahlildan o‘tishlari shart etib belgilandi.
Tahlil jarayoni ikki bosqichda olib boriladi va dastlabki natija musbat chiqqan taqdirda, chuqurlashtirilgan mass-spektrometrik identifikatsiya tekshiruvi o‘tkaziladi. Giyohvandlik vositasi aniqlangan yoki biologik namuna topshirishdan bosh tortgan fuqarolar harbiy-tibbiy ko‘rikka qo‘yilmaydi. Shuningdek, hujjatda barcha shaxsiy ma’lumotlar hamda tahlil natijalarining maxfiyligi to‘liq ta’minlanishi kafolatlangan.
