“Halol nasiya” bahonasida 50 kishini chuv tushirgan firibgar Toshkentda qo‘lga olindi
Ijtimoiy tarmoqlarda “Apple Nasiya” hamda “Halol Nasiya Savdo” sahifalari orqali odamlarning ishonchiga kirib kelgan Qashqadaryo viloyatida tug‘ilgan R.Q. ismli fuqaro Toshkent shahrining Uchtepa tumanida yashirinib yurgan joyida qo‘lga olindi.
Ushlanish chog‘ida gumonlanuvchiga tegishli telefon ko‘zdan kechirilganda, unda mazkur soxta profillar va fuqarolarni aldashda foydalanilgan materiallar ashyoviy dalil sifatida aniqlandi. Dastlabki surishtiruvlarga ko‘ra, ushbu tarmoqlar orqali 50 ga yaqin fuqaro moddiy zarar ko‘rgani aytilmoqda.
Tergovdan qochib yurgani sababli Buxoro shahar sudi tomonidan sirtdan “qamoqqa olish” ehtiyot chorasi qo‘llangan ushbu shaxsga nisbatan Jinoyat kodeksining 168-moddasi (Firibgarlik) tegishli bandlari bilan jinoyat ishi qo‘zg‘atilgan. Hozirda tergov davom etmoqda va jabrlangan boshqa fuqarolarni aniqlash choralari ko‘rilmoqda.
