Fuqaro uyiga adashib kirib, reyd o‘tkazgan Shahrisabz hokimiga Antokorrupsiya agentligi xizmat tekshiruvi o‘tkazishni so‘radi
Ijtimoiy tarmoqlatrda Qashqadaryo viloyati Shahrisabz tumani hokimi fuqaroning uyiga kirib borgan videosi tarqaldi.
Tasvirlarda tuman hokimi xonadon egasiga yashash joyini tanqid qilib, olingan video mahallaning Telegram guruhiga tashlanishini aytgani aks etgan.
“Ertaga shu ro‘zg‘orga, masalan, ‘normalniy’ odam kelin bermaydi. Bugun kanalga qo‘yiladi hozir. Mana shu mahalla kanalida o‘zingizni ko‘rasiz. Anavi qo‘shningizni ham oldik”, degan hokim.
Bundan tashqari, u ushbu xonadon vakillariga jarima solishni ham buyurgan.
“Hozir jarimani urasiz. Ko‘cha, uyini, yashash, axlat, hammasi uchun jarima urasiz. Menga birortasidan men iltimos qildim, kechirim so‘radi degan gap kerak emas”, deya ta’kidlagan hokim.
Hokimning mazkur harakati ko‘plab muhokamalarga sabab bo‘lgach, videodagi xonadonga adashib kirib qolgani haqida bayonot bilan chiqdi. Unda aytiladiki, mahalla raisi yon hovlidagi nogironligi bo‘lgan keksa er-xotinlarning darvozasini emas, o‘rniga adashib boshqa darvozani ko'rsatib yuborgan.
“Tuman hokimi “Shamaton” mahallasida o‘rganishlar davomida yo‘l bo‘yida joylashgan, tashqi ko‘rinishi qarovsiz holatdagi xonadonga e’tibor qaratgan. Mahalla raisidan ushbu uyda kim yashashi so‘ralganda, u yerda nogironligi bo‘lgan keksa er-xotinlar istiqomat qilishi ma’lum qilingan. Fuqarolarning holidan xabar olish va muammolarini o‘rganish maqsadida xonadonga tashrif buyurilgan. Biroq, yonma-yon joylashgan va darvozalari bir joyda bo‘lganligi sababli mahalla raisi tomonidan xonadonlar darvozasi adashib ko‘rsatilgan. Natijada dastlab boshqa xonadonga kirilgan”, – deyiladi hokimiyat bayonotida.
Mazkur holatlardan so‘ng Korrupsiyaga qarshi kurashish agentligi viloyat hokimligiga holat yuzasidan qonunchilikda belgilangan tartibda xizmat tekshiruvi o‘tkazish hamda huquqiy baho berish bo‘yicha taqdimnoma kiritdi. Mazkur taqdimnoma Agentlikning davlat xizmatchilari tomonidan odob-axloq qoidalariga rioya etilishi ustidan nazoratni muvofiqlashtirish bo‘yicha vakolatlari doirasida kiritilgan.
Shuningdek, har qanday darajadagi rahbar fuqarolar bilan muloqotda davlat xizmatchisi odob-axloq qoidalariga qat’iy rioya qilishi shartligini ham qayd etdi. Fuqarolarning shaxsiy hayoti daxlsizligini buzish, ularning sha’ni va qadr-qimmatini kamsitish, shuningdek, asossiz ma’muriy bosim o‘tkazish qonunchilik hamda etika me’yorlariga mutlaqo zid ekani ta’kidlandi.
