Farg‘onada Spark urib ketgan YPX xodimi vafot etdi
Joriy yilning 31 iyul kuni soat taxminan 23:30 larda Farg‘ona viloyati O‘zbekiston tumanida Spark urib yuborgan YPX xodimi serjant Hayitbek Karimjonov vafot etdi. Bu haqda viloyat IIB xabar berdi.
Ma’lum qilindiki, holat O‘qchi mahallasi hududidan o‘tuvchi 40V064 avtomobil yo‘lining 20-kilometrida sodir bo‘lgan.
30 yoshli haydovchi mast holda Spark’ni boshqarib kelayotib, tungi xizmatni olib borayotgan Farg‘ona viloyati IIB Jamoat xavfsizligi xizmati YHXB 2-mintaqaviy hudud YPX otryadi 3-safarbar guruhi YPX katta inspektori, serjant Hayitbek Karimjonovning to‘xtash haqidagi qonuniy talabiga bo‘ysunmasdan uni urib yuborgan.
Oqibatda u og‘ir tan jarohatlari bilan shifoxonaga olib borilgan. Ko‘rsatilgan tibbiy muolajalarga qaramasdan, u jonlantirish bo‘limida vafot etgan.
Serjant Hayitbek Karimjonov 2022-yildan ichki ishlar organida xizmat qilgan. Uning onasi, ayoli va 2 nafar farzandi bo‘lgan.
Portal24.uz tahririyati marhumning oila a’zolari hamda yaqinlariga chuqur hamdardlik bildiradi.
