“Eng yaxshi ota” va “Eng yaxshi ona”. Telegram akkauntlarni o‘g‘irlashning yangi usuli paydo bo‘ldi
Kiberxavfsizlik markazi aholini ushbu yangi hiyladan ogoh bo‘lishga va messenjer kodlarini begona saytlarga kiritmaslikka chaqirdi. Odamlarga Telegram orqali “eng yaxshi bobo”, “eng yaxshi buvi”, “eng yaxshi ota” yoki “eng yaxshi ona” nominatsiyalarida tanlov ishtirokchisiga ovoz berish so‘ralgan shubhali xabarlar kelib tushmoqda. Matnga biriktirilgan havola orqali o‘tilganda, foydalanuvchi tashqi ko‘rinishidan haqiqiy tanlov sahifasiga o‘xshash soxta saytga tushib qoladi.
Tizimda ovoz berish jarayonini yakunlash uchun foydalanuvchiga Telegram orqali avtorizatsiyadan o‘tish va messenjerga kelgan maxfiy tasdiqlash kodini kiritish taklif etiladi. Jabrlanuvchi ushbu kodni soxta saytga kiritgan zahoti, jinoyatchilar uning akkauntini to‘liq o‘z nazoratiga oladi. Akkaunt egallangach, firibgarlar ushbu profil egasi nomidan uning yaqinlari hamda kontaktlariga zudlik bilan pul o‘tkazib berishni so‘rab xabarlar yuborishni boshlaydi.
Mutaxassislarning ta’kidlashicha, xabar va havola hatto yaqin tanishingiz yoki qarindoshingizdan kelgan bo‘lsa ham, hech qanday holatda Telegram yuborgan maxfiy kodlarni uchinchi shaxslarga yubormaslik hamda shubhali saytlarga kiritmaslik zarur. Akkaunt xavfsizligini ta’minlash uchun messenjer sozlamalarida ikki bosqichli tasdiqlash (Two-Step Verification) funksiyasini yoqib qo‘yish tavsiya etiladi.
