Энергияни тежаш маданияти юксалиб бормоқда
Энг оммалашган қадам — LED чироқларга ўтиш бўлиб, бугун уй хўжаликларининг 87 фоизи айнан ундан фойдаланмоқда. Айрим ҳудудларда эса бу кўрсаткич 90 фоиздан ошган. Оддий лампаларни LED ёритишга алмаштириш электр энергияси истеъмолини бир неча баробар камайтириш имконини беради.
Бундан ташқари, уй хўжаликларининг 44 фоизи пластик дераза ва эшиклар ўрнатиш орқали иссиқлик йўқотилишини қисқартирган, 31 фоизи эса энергия тежамкор маиший техникага ўтган.
Қайта тикланадиган энергия манбаларига қизиқиш ҳам тобора ортиб боряпти. Қуёш панелларини ўрнатган оилаларнинг ярмидан кўпи олинган натижалардан мамнун эканини билдириб, келгусида улар сонини кўпайтиришни режалаштирмоқда.
Таҳлиллара кўра, Ўзбекистонда тахминан 1,9 миллион уй хўжалигида қуёш панелларига эҳтиёж мавжуд бўлиб, бу 2,3 миллиард доллардан ортиқ ички бозор салоҳиятини шакллантиради. Бу нафақат оилалар учун иқтисодий фойда, балки янги тармоқ ривожи учун ҳам муҳим омилдир.
Ҳисоб-китобларга кўра, биноларни иссиқликдан изоляциялаш, иситиш тизимларини янгилаш ва эски дераза-эшикларни алмаштириш орқали кўп хонадонли уй-жойларда йилига 60 миллион доллардан ортиқ энергия ресурсларини тежаш мумкин. Шу каби катта имкониятлар ижтимоий соҳада ҳам мавжуд: Жаҳон банки тадқиқотларига асосан, мақсадли инвестициялар ҳисобига энергия истеъмолини 20–50 фоизгача қисқартириш ва йиллик истеъмолни 7,1 млрд кВт·соатга камайтириш мумкин.
Бугун энергияни тежаш — бу чеклов эмас, балки оқилона ёндашув, барқарор тараққиёт ва келажак авлодлар олдидаги масъулиятдир. Энергиядан оқилона фойдаланиш маданияти иқтисодиёт барқарорлиги ва атроф-муҳитни асраш йўлидаги муҳим қадам ҳисобланади.
