Endilikda mashinani voyaga yetmagan shaxsga topshirish jinoiy javobgarlikka sabab bo‘lishi mumkin
O‘zbekistonda endilikda voyaga yetmagan shaxslarga avtomobil topshirish alohida ma’muriy va jinoiy javobgarlikka sabab bo‘lishi mumkin. Bu haqda bugun, 4-avgust kuni Oliy Majlis Qonunchilik palatasi majlisida Yo‘l harakati qoidalarining ba’zi qoidabuzarliklari uchun javobgarlikni kuchaytirish to‘g‘risidagi qonun loyihasida keltirib o‘tildi.
Loyihaga ko‘ra, avtomobilni boshqarishni voyaga yetmagan shaxsga topshirganlik uchun alohida ma’muriy javobgarlik, og‘ir oqibatlarga olib kelgan bo‘lsa, jinoiy javobgarlik belgilash taklif etilmoqda.
Majlisda ushbu taklifga asos sifatida quyidagi raqamlar keltirib o‘tilgan:
2025 yilda O‘zbekistonda qariyb 27 million yo‘l harakati qoidabuzarligi qayd etilgan bo‘lib, ularning 77 foizi qo‘pol qoidabuzarliklar tashkil etgan. YHTlar oqibatida 2188 kishi halok bo‘lgan, yana 8900 kishi turli darajadagi tan jarohatlari olgan.
Jami transport hodisalarining 1832tasi inson o‘limiga, 7394 tasi esa fuqarolarning tan jarohati olishiga sabab bo‘lgan.
Avtomobilni 14 yoshdan 16 yoshgacha bo‘lgan voyaga yetmagan shaxslarga boshqarish uchun topshirish holatlari qariyb 2500 marta qayd etilgan. Bu kabi hodisalar oqibatida 44 kishi halok bo‘lgan, 101 kishi jarohat olgan.
Yana 92 kishi mast holatdagi haydovchilar ishtirokidagi YHTlarda halok bo‘lgan, 46 kishi jarohatlangan.
Majlisda misol tariqasida joriy yilning fevral oyida Toshkentda yuz bergan halokat keltirib o‘tildi. BMW avtomobilini 10-sinf o‘quvchisi boshqargan, halokat oqibatida yo‘l-patrul xizmati inspektori halok bo‘lgan edi.
Mazkur normaning maqsadi jazoni kuchaytirish emas, balki avtomobil egalarining mas’uliyatini oshirish hamda bolalar va boshqa harakat ishtirokchilarini himoya qilishdan iborat.
Muhokamalar yakunida deputatlar qonun loyihasini birinchi o‘qishda qabul qidi.
