Endi Ozarbayjonda ishlagan o‘zbekistonliklarning staji pensiya tayinlashda kuyib ketmaydi
O‘zbekiston Pensiya jamg‘armasi xabar qiladiki, yangi kelishuvga binoan fuqaroning har ikki davlat hududida to‘plagan ish staji pensiya tayinlashda birgalikda hisobga olinadi. Agar biror mamlakatdagi staj pensiyaga chiqish uchun yetarli bo‘lmasa, ikkinchi tomonda ishlangan yillar qo‘shiladi hamda har bir taraf o‘z hududidagi stajga mutanosib ravishda to‘lovlarni amalga oshiradi.
Tizimning muhim afzalliklaridan biri – tayinlangan pensiyalarning boshqa davlatga ko‘chib o‘tilgan taqdirda ham saqlanib qolishidir. Fuqaro xohishiga ko‘ra to‘lovlarni u yashayotgan mamlakat hududiga o‘tkazish yoki pensiya tayinlagan davlatning o‘zida olish imkoniga ega bo‘ladi, bu esa to‘lovlar bekor qilinishi yoki kamaytirilishining oldini oladi.
Shuningdek, hujjatlar yig‘ish va murojaat qilish tartibi sezilarli darajada soddalashtirilmoqda. Fuqaro o‘zi istiqomat qilayotgan joydagi pensiya organiga murojaat qilishi yetarli bo‘lib, mas’ul idoralar o‘zaro to‘g‘ridan-to‘g‘ri ma’lumot va hujjat almashinuvini yo‘lga qo‘yadi. Mazkur bitim barcha rasmiy tartib-taomillar va ma’muriy kelishuvlar yakunlangach to‘liq kuchga kiradi.
