Denovda uyi buzilgan fuqaroga yangisi qurib beriladi. Ijrochilar viloyat hokimi bilan bemaslahat ish qilgan
Aholining e’tirozlariga sabab bo‘lgan hodisa yuzasidan Majburiy ijro byurosi va Surxondaryo viloyati hokimligi munosabat bildirdi. MIB ma’lumotiga ko‘ra, Denov tumanidagi 0,20 gektar sug‘oriladigan fermer yerida noqonuniy qurilgan uy-joy sud qaroriga asosan 7-avgust kuni majburiy tartibda buzilgan. Tarmoqlarda aytilgan “ogohlantirish berilmagani” haqidagi da’volar rasman rad etildi.
Surxondaryo viloyati hokimi Ulug‘bek Qosimov Denovda uyi buzilgan fuqaro bilan uchrashib, MIB xodimlarining harakatini tanqid qildi hamda bayramgacha auksion orqali yer ajratib, yangi uy qurib berilishini ma’lum qildi.
Denov tumanida MIB tomonidan uyi noqonuniy deb buzilgan fuqaro bilan uchrashgan viloyat hokimi Ulug‘bek Qosimov ijrochilarning maslahatsiz harakat qilganidan jahli chiqqanini yashirmadi. Hokim fuqaroning o‘zboshimchalik bilan sug‘oriladigan yerga hujjat topshirmay uy qurib, qonunni buzganini ta’kidlagan bo‘lsa-da, vaziyatni insoniylik nuqtai nazaridan hal qilish lozimligini bildirgan.
Uchrashuv davomida hokim fuqaroga qonuniy mulk huquqini beruvchi yangi joy va'da qilib, ijrochilarga ham e'tirozini yashirmagan.
“Sizning xatoyingiz, birinchidan, sug‘orilgan joyga hujjat qilmasdan chala qilib qurilish qilgansizlar... Shu men bugun ko‘rib, to‘g‘risi rosa mana bu ijrochilarning ham jahlim chiqdi. Lekin bu noinsoflar mana bu biroz maslahat qilganda, bizlar sizga narigi tomondan shuni qilib, keyin buni olib tashlab yuborardik... Sizga bir qonuniy joy topamiz. Auksiondan o‘zingizga qilamiz, opa, shoshilmasdan. Bir 10-15 kun, 20 kun ketar. Chiroyli qilib bitta vatan qilib... Uyingiz buzilib ketganini ham sezilmaydigan qilamiz”, deya ta'kidladi Ulug‘bek Qosimov.
Viloyat hokimligi fuqaro uy-joysiz qolmasligi va uning manfaatlari hisobga olinishini bildirgan. Unga ko‘ra, fuqaroga yangi turar joy qurib berilishi belgilandi va bu masala alohida nazoratga olingan.
