“Darxon”dagi yashil hududni egallagan “Muzey Plova” oshxonasining noqonuniy konteynerlari olib tashlanadi
Mirzo Ulug‘bek tumani “Darxon” mahallasi fuqarolarining ijtimoiy tarmoqlardagi e’tirozlaridan so‘ng tuman hokimligi Matbuot xizmati holatni o‘rgandi. Tekshiruv davomida “Muzey Plova” umumiy ovqatlanish shoxobchasi Obyektga tutash hududdan mavsumiy foydalanish ruxsatnomasiga ega bo‘lsa-da, belgilangan chegaradan chiqib, vaqtinchalik saqlash uchun noqonuniy konteynerlar joylashtirgani ma’lum bo‘ldi.
Tadbirkor bilan tushuntirish ishlari olib borilib, yashil hudud va tabiiy landshaftga zarar yetkazmaslik hamda jamoat joylaridan tartib bo‘yicha foydalanish zarurligi uqtirildi. Hokimlik ushbu noqonuniy konteynerlar olib tashlanishini va hudud tartibga keltirilishini bildirdi.
