Cobalt siqib chiqargan Spark ag‘darilishi oqibatida ota va uning 5 yoshli farzandi halok bo‘ldi
Ijtimoiy tarmoqlarda tarqalgan videoda Cobalt Spark’ni quvib o‘tayotgan vaqtda unga keskin yaqinlashib, yo‘l chetiga siqib qo‘ygani aks etgan. Oqibatda Spark yo‘ldan chiqib ketib ag‘darilgan, qoidabuzar Cobalt esa to‘xtamay, hodisa joyidan qochib ketgan. Oila a’zolaridan yana bir ayol og‘ir tan jarohatlari olib, shifoxonaga yotqizilgan.
Toshkent viloyati IIBB ma’lumotiga ko‘ra, YTH 15-avgust kuni soat 09:30 larda sodir bo‘lgan. Tezkor surishtiruvlar natijasida voqea joyidan ketib qolgan Cobalt haydovchisi – 30 yoshli X.A. o‘sha kunning o‘zida aniqlanib, qo‘lga olindi.
Holat yuzasidan Jinoyat kodeksining 266-moddasi 3-qismi “a” bandi (odamlar o‘limiga sabab bo‘lgan transport vositalari harakati xavfsizligi qoidalarini buzish) bo‘yicha jinoyat ishi qo‘zg‘atildi. Hozirda gumonlanuvchiga nisbatan tergov harakatlari olib borilmoqda.
