Chorvoqda bir oilaning uch a’zosi cho‘kib halok bo‘ldi — FVV tafsilotlarni ochiqladi
Avvalroq Toshkent viloyatidagi Chorvoq suv omborida katerda sayrga chiqqan ota va uning ikki nafar o‘g‘li suvga tushib, cho‘kib ketgani xabar qilingan edi. Favqulodda vaziyatlar vazirligi holat haqida to‘liq ma’lumot berdi.
2-sentyabr kuni sodir bo'lgan ushbu fojiali hodisa Bo‘stonliq tumaniga qarashli “Birlik” MFY hududida yuz bergandi.
Qutqaruv otryadining komandiri Rustam Boʻriyevga ko'ra, kater boshqaruvchisi va yana 5 kishi — ota-ona, ikki o‘g‘il va qiz farzandi bo‘lgan.
“Oila katerda sayr qilishga chiqqan. Suv boʻylab rasmga tushish maqsadida choʻmilish taqiqlangan joyda toʻxtashgan. Keyin ular shu oʻrtada choʻmilishni xohlashgan”, deydi Bo‘riyev.
Suvga avval o‘g‘illardan biri, keyin qutqaraman deb ota tushgan, ortidan yana bitta oʻgʻli tushgan. Va oʻsha ketma-ketlikda shu ayanchli vaziyat yuzaga kelgan.
Ona va qiz atrofdan yordam soʻrashgan. Katerni boshqarayotgan haydovchisi ham suvga tushib, ularni qutqarishga harakat qilgan, lekin imkoni boʻlmagan. Bu juda tez sodir boʻlgan.
Choʻmilish jarayonida qutqaruv jiletlaridan foydalanishmagan. Oqibatda oilaning dadasi hamda ikkita oʻgʻlining choʻmilayotganda tomiri tortishib qolgan. Shuningdek, o‘sha mahal shamol ham boʻlib turgan, suvda ozgina toʻlqin hosil boʻlgan — oʻsha jarayonda choʻkish holati yuz bergan”, deydi Boʻriyev.
Hozirda qidiruv-qutqaruv ishlariga beshta qutqaruv otryadi va suvdagi yettita brigada jalb qilingan. Shuningdek, vazir topshirig‘iga ko‘ra, Sirdaryo va Jizzax viloyatlaridan qo‘shimcha qutqaruvchilar yetib kelgan. Voqea joyida maxsus shtab tuzilib, tegishli vazirlik va hamkor xizmatlar bilan birgalikda qidiruv ishlari olib borilmoqda.
