Chirchiqda yuk mashinasining yarim tirkamasi uzilib, xonadon devorini buzib kirdi
Chirchiq shahrida kombayn ortib ketayotgan yuk avtomobilining yarim tirkamasi uzilib, yo‘l chetidagi xonadon hududiga kirib ketgan. Jabrlanganlar yo‘q, zarar qonunchilik tartibida qoplanadi.
Chirchiq shahrida kombayn ortib ketayotgan yuk avtomobilining yarim tirkamasi uzilib, yo‘l chetidagi xonadon hududiga kirib ketdi. Hodisa bugun soat 16:00 atrofida “Sadriddin Ayniy” ko‘chasida sodir bo‘lgan.
Qayd etildiki, 1977-yilda tug‘ilgan haydovchi boshqaruvidagi “Howo” rusumli yuk avtomobiliga ulangan yarim tirkama texnik sababga ko‘ra uzilib ketgan. Shundan so‘ng tirkama yo‘l chetidagi xonadonga borib urilgan.
Hodisa oqibatida fuqarolarning sog‘lig‘iga zarar yetmagan. Vaqtincha cheklangan yo‘l harakati hozirda to‘liq tiklangan.
Xonadonga yetkazilgan zarar qonunchilikda belgilangan tartibda qoplanishi ma’lum qilindi. Holat yuzasidan Chirchiq shahar IIB tomonidan surishtiruv olib borilmoqda.
