Chilonzorda Kichik halqa avtomobil yo‘lining bir qismi 10-avgustgacha yopiladi
Toshkentning Chilonzor tumanida Kichik halqa avtomobil yo‘lining Bunyodkor shoh ko‘chasi bilan Arnasoy ko‘chasi oralig‘idagi qismida qurilish-montaj ishlari sabab transport harakati vaqtincha cheklanadi. Bu haqda poytaxt Yo‘l harakatini tashkil etish markazi xabar berdi.
Ma’lum qilinishicha, yo‘lning mazkur qismida kapital ta’mirlash ishlari doirasida yuqori sifatli asfalt qoplamasi yotqiziladi. Shu munosabat bilan 2026-yil 6-avgust soat 23:00 dan 10-avgust soat 08:00 gacha yo‘lning ta’mirlanayotgan tomoni transport harakati uchun yopiladi.
Bu vaqt davomida avtotransport vositalari oqimi yo‘lning qarama-qarshi tomoniga yo‘naltiriladi va harakat vaqtinchalik sxema asosida tashkil etiladi. Tez tibbiy yordam mashinalari uchun esa alohida vaqtinchalik harakat yo‘nalishi ajratiladi.
Haydovchilarga yo‘l belgilariga amal qilish, tezlikni pasaytirish hamda harakat yo‘nalishini oldindan rejalashtirish tavsiya etildi. Yo‘lni sifatli kapital ta’mirlash va ishlarni xavfsiz yakunlash maqsadida joriy etilgan cheklovlar 10-avgust kuni soat 08:00 gacha amal qiladi.
