“Bu ayol jamiyatda yashashga ham loyiq emas” — Fargʻonada bosh hamshira 4 nafar xodimni pichoqladi
Bosh prokuratura matbuot xizmati holatni tasdiqlagan. Xabarlarga koʻra, hujum 7-sentabr kuni sodir boʻlgan. Dastlabki rasmiy maʼlumotlarda ikki nafar hamshira pichoqlangan, ulardan biri voqea joyida vafot etgan, ikkinchisining hayoti tezkor tibbiy yordam tufayli saqlab qolinganligi aytilgan edi. Keyinchalik jabrlanuvchilarning yaqinlari va guvohlar jami toʻrt nafar xodim jarohatlanganini, ulardan birining ya’ni o’sha yerda ishlovchi farrosh yurak sohasidan olgan jarohati tufayli voqea joyida vafot etganini maʼlum qilmoqda.
Jabrlanuvchining turmush oʻrtogʻi va boshqa guvohlarning soʻzlariga koʻra, hujumni shifoxonaning katta bosh hamshirasi amalga oshirgan. U xodimlarni xonasiga “uyimni sotdim, har biringizga 200 dollar beraman” deb chaqirib, eshikni ichkaridan qulflagan. Shundan soʻng pichoq bilan hujum qilgan. Bir nafar hamshira derazadan oʻzini tashlab qochgan, biroq gumonlanuvchi uni quvib yana pichoqlagan. Yana bir xodim eshikni ochishga urinayotganda orqasidan zarba olgan.
Shifoxona rahbariyati vakilining aytishicha, hodisa joyiga yetib borganda ichki ishlar, prokuratura va tez yordam xodimlari allaqachon ish olib borayotgan edi. Gumonlanuvchi ayol qoʻllarini yuvib, bemalol mashinada binodan chiqib ketgan. Xodimlarda maxsus signal knopkasi boʻlgani uchun 3 daqiqa ichida huquq-tartibot organlari yetib kelgan va uni ushlab olib kelishgan.
Jabrlanuvchilarning yaqinlari gumonlanuvchi avval ham qoʻshnisiga tan jarohati yetkazgani va qamalganini, shunga qaramay tibbiyot muassasasida boshliq lavozimida ishlashda davom etganini taʼkidlamoqda. Ularning soʻzlariga koʻra, ayol kredit olish uchun qoʻl ostidagi xodimlarni kafil qilib qoʻygan, shu sababli koʻpchilik undan qoʻrqib, hatto maoshlarini ham darhol bankdan olib kelgan. Jabrlanuvchining kelini “Hamma deyarli kasalxonada u ayoldan qoʻrqardi” degan.
Guvohlarning daʼvo qilishicha, gumonlanuvchi oktabr oyida nafaqaga chiqishi rejalashtirilgan edi. U xodimlarga “Sizlarni ham quritib chiqib ketaman” mazmunidagi tahdidlar qilgan va ishdan ketishidan oldin “hisob-kitob qilib olish” niyatida boʻlgani aytilmoqda.
Shifoxona shifokorining maʼlumotiga koʻra, uch nafar jarohatlangan xodim jonlantirish boʻlimiga olib kelingan. Ulardan ikkisining ahvoli qoniqarli, bittasiniki ogʻir. Jarohatlar asosan koʻkrak qafasi va orqa qismiga yetkazilgan, ichki aʼzolarga yetib bormagan.
Psixiatriya boʻlimi xodimi ayolning ruhiy holati boʻyicha hech qanday shikoyat yoki muammo kuzatilmaganini, tibbiy koʻriklar paytida ham ruhiy jihatdan sogʻlom deb topilganini bildirgan.
Holat yuzasidan Qoʻshtepa tuman prokuraturasi Jinoyat kodeksining 97-moddasi (qasddan odam oʻldirish) boʻyicha jinoyat ishi qoʻzgʻatgan. Gumonlanuvchi ayol protsessual tartibda ushlangan. Bosh prokuratura matbuot kotibi Hayot Shamsutdinov tergov organlari barcha tafsilotlarni oʻrganayotganini maʼlum qilgan. Tergov davom etmoqda.
