Bozorlarda joy ijarasi va barcha to‘lovlar elektron shaklga o‘tkaziladi
Vazirlar Mahkamasi bozorlar va savdo majmualari faoliyatini raqamlashtirishga oid qaror qabul qildi. Hujjatga ko‘ra, xizmat ko‘rsatish haqi va savdo nuqtalari ijarasidan tortib barcha to‘lov turlari bosqichma-bosqich elektron tizimga o‘tkaziladi.
Yangi tizim doirasida ijara haqi, bir martalik yig‘imlar va ko‘rsatilgan xizmatlar uchun to‘lovlar shaffof raqamli platforma orqali amalga oshiriladi. Savdo joylari va maydonlari haqidagi ma’lumotlar yagona bazaga kiritilib, ijara shartnomalari elektron formatga o‘tkaziladi. Shuningdek, bozorlar faoliyatini onlayn monitoring qilish imkoniyati yaratiladi.
Islohotlar infratuzilmani yangilashni ham qamrab oladi: avtoturargoh va hojatxonalar avtomatlashtirilgan to‘lov tizimlari bilan jihozlanadi, noqonuniy qurilmalar buziladi hamda hududlar obodonlashtiriladi.
“E-bozor” platformasi 2026-yil 1-oktabrdan boshlab Soliq qo‘mitasining “Soliq” tizimida sinov rejimidan o‘tkaziladi. Tizimni to‘liq ishga tushirish esa 2027-yil 1-martga mo‘ljallangan. Platformada bozorlar haqidagi ma’lumotlar, bo‘sh joylar va e’lonlar joylashtiriladi. Bundan tashqari, tadbirkorlar bozor ma’muriyatiga elektron murojaat yo‘llash va rasmiy javob olish imkoniga ega bo‘ladi.
Platformani rivojlantirish va uning faoliyatini nazorat qilish Soliq qo‘mitasi zimmasiga yuklatildi. Mazkur raqamlashtirish jarayoni savdo sohasidagi yashirin iqtisodiyot darajasini pasaytirishga xizmat qilishi kutilmoqda.
