Boysundagi avariyaviy quduqni yopish rasman boshlandi
15-avgust kuni Surxondaryo viloyati Boysun tumanida joylashgan ushbu avariyaviy quduqni yopish bo’yicha amaliy ishlar rasman boshlandi. Bu haqda Uzbekneftgaz AJ xabar qildi.
2024-yil 1-sentabrda “Mustaqillikning 25 yilligi” (M-25) konidagi 604-sonli quduqda burg‘ilash ishlari paytida yuqori bosimli va tarkibida oltingugurt vodorodi (H₂S) miqdori yuqori bo‘lgan gaz sizib chiqa boshlagan edi. Dastlabki choralar natijasida 15-sentabrda sizib chiqish vaqtincha to‘xtatilgan bo‘lsa-da, 17-sentabrda yana qayta boshlangan. Hodisa oqibatida 4 kishi vafot etgan, 11 kishi jarohatlangan va yaqin atrofdagi aholi evakuatsiya qilingan.
Keyinchalik 2025-yil mart oyida ham shunga o‘xshash holat qayd etilgan. Shu sababli Prezident Shavkat Mirziyoyev joriy yil fevral oyida ushbu avariyani imkon qadar tezroq bartaraf etish yuzasidan kechiktirib bo‘lmas topshiriqlar bergan edi.
Hozirgi bosqichda Xitoyning CNPC korporatsiyasi jalb etilgan. Mutaxassislar maxsus “relief” (qutqaruv) quduqlarini burg‘ilash orqali asosiy avariyaviy quduqqa ta’sir o‘tkazish, bosimni pasaytirish va xavfsiz yopish usulini qo‘llamoqchi. Burg‘ilash ishlari 2027-yil yanvar oyidan boshlanishi, to‘liq yopish esa 2027-yil iyuliga qadar yakunlanishi rejalashtirilgan.
“Mustaqillikning 25 yilligi” koni Surxondaryo viloyatidagi eng yirik o‘zlashtirilmagan gaz konlaridan biri hisoblanadi. Uning zaxiralari 150 milliard kub metrdan ortiq baholanadi va yuqori oltingugurtli gaz tarkibiga ega. Shu bois bu konni xavfsiz holatga keltirish nafaqat ekologik, balki iqtisodiy ahamiyatga ham ega.
