Boysun o‘rmonidagi yong‘in 300 dan ortiq odam jalb qilinib, bir sutkada o‘chirildi
12-avgust kuni soat 17:15 larda 112 xizmatiga Boysun tumani “Chilonzor” mahallasida joylashgan davlat o‘rmon xo‘jaligining “Xomkon” bo‘limida yong‘in chiqqani haqida xabar kelib tushgan. Hududdagi quruq o‘t-o‘lanlar va shox-shabbaga tushgan olov tez fursatda yoyilib ketgan.
Olovni jilovlash uchun FVBning 194 nafar qutqaruvchisi va 8 ta texnikasi, o‘rmon xo‘jaligining 60 nafar xodimi hamda 55 nafar ko‘ngilli mahalliy aholi vakillari safarbar etildi. Jami 309 kishi va 11 ta maxsus texnika vositasida olib borilgan uzluksiz harakatlar natijasida alanga 13-avgust kuni soat 17:30 da to‘liq o‘chirildi.
Viloyat FVB bergan ma’lumotlarga ko‘ra, hodisa oqibatida taxminan 1 gektar maydon yonib ketgan. Aholi va qutqaruvchilar orasida jarohatlanganlar yoki halok bo‘lganlar yo‘q. Hozirda mutaxassislar tomonidan yong‘inning kelib chiqish sabablari o‘rganilmoqda.
