Bo‘stonliqda Xitoy granti hisobiga barpo etilgan yangi shamol elektr stansiyasi ishga tushirildi
Yangi energetika obyekti Xitoy hukumati tomonidan ajratilgan 28 million AQSH dollari miqdoridagi beg‘araz grant mablag‘lari hisobidan barpo etildi. Toshkent viloyatidagi ochilish marosimida Xitoyning O‘zbekistondagi elchisi Yuy Tzyun, “O‘zbekgidroenergo” AJ mutassidilari, Energetika vazirligi hamda mahalliy hokimlik vakillari ishtirok etgan.
Stansiya hududida har birining quvvati 5 MVt bo‘lgan 4 ta zamonaviy shamol turbinasi o‘rnatilgan. Mazkur stansiya to‘liq quvvat bilan ishga tushgach, yiliga 50 million kVt·soatgacha ekologik toza elektr energiyasi ishlab chiqarish imkoniyatiga ega bo‘ladi. Bu hajm hududdagi qariyb 20 mingta xonadonning elektr energiyasiga bo‘lgan ehtiyojini uzluksiz ta’minlash uchun yetarlidir.
Mazkur loyihaning amaliyotga tatbiq etilishi nafaqat hududni elektr energiyasi bilan ta’minlaydi, balki atrof-muhit muhofazasiga ham ijobiy ta’sir ko‘rsatadi. Stansiya faoliyati evaziga har yili yuz minglab kubometr tabiiy gaz tejaladi va atmosferaga chiqarilayotgan issiqxona gazlari miqdori sezilarli darajada kamayadi.
