Bolalar maydonchasini buzgan kompaniya rahbari Toshkentda qamoqqa olindi
Toshkent shahri Mirobod tumanidagi “Lolazor” mahallasi aholisi e’tirozlariga sabab bo‘lgan noqonuniy qurilish yuzasidan tekshiruv o‘tkazildi. Ma’lum bo‘lishicha, avval “Mahalla” jamoat xayriya jamg‘armasi balansida bo‘lgan hudud keyinchalik “Al-Latif Hearts Tower” MChJ tasarrufiga o‘tkazilgan.
Aholi bino qurilishiga keskin qarshi chiqqani hamda investitsiya shartnomasi bekor qilinganiga qaramay, 2026-yilning iyun oyida jamg‘armaga tegishli 172 kvadrat metrlik bino buzib tashlangan. Tergov ma’lumotlariga ko‘ra, ushbu harakatlar oqibatida davlat manfaatlariga ko‘p miqdorda zarar yetkazilgan.
Holat yuzasidan Mirobod tumani prokuraturasi tomonidan Jinoyat kodeksining tegishli moddalari bilan jinoyat ishi qo‘zg‘atilib, kompaniyaning norasmiy rahbari Asliddin Ikromov gumonlanuvchi sifatida ushlandi. Hozirda tergov harakatlari olib borilmoqda, huquqni muhofaza qiluvchi organlar bolalar maydonchasini avvalgi holatiga qaytarish choralarini ko‘rmoqda.
