Bloger Otabek Mahkamov “Mardlik” ordeni bilan taqdirlandi
Prezidentning 13-avgustdagi farmoni bilan mamlakat iqtisodiyoti va eksport salohiyatini oshirish, investitsiya jalb qilish, yangi ish o‘rinlari yaratish hamda aholi farovonligini yuksaltirishga hissa qo‘shgan bir guruh tadbirkor va mutaxassislar taqdirlandi. Mukofotlanganlar safidan sanoat, qurilish, fermerlik va xizmat ko‘rsatish sohasi vakillari joy olgan.
Davlat mukofotlari doirasida Samarqanddagi “Azia metall prof” MChJ direktori Odiljon Boltayevga “O‘zbekiston Respublikasida xizmat ko‘rsatgan tadbirkor” faxriy unvoni berildi. Shuningdek, uch kishi “Fidokorona xizmatlari uchun”, to‘rt kishi “Mehnat shuhrati”, 14 kishi “Do‘stlik” va besh kishi, jumladan bloger Otabek Mahkamov “Mardlik” ordeni bilan taqdirlandi. Yana bir qator mutaxassislarga “Jasorat”, “Kelajak bunyodkori” hamda “Shuhrat” medallari topshirildi.
Ta’kidlash joizki, mukofotlanganlar orasida xorijiy investorlar va xalqaro kompaniyalar rahbarlari ham bor. Xususan, “AZC group” vakili Rastislav Babitsa, “Voltalia” boshqaruvi raisi Robert Klain hamda “Odas Enerji CA” rahbari O‘ral O‘zkan mamlakatimiz iqtisodiy taraqqiyotiga qo‘shgan munosib hissasi uchun “Do‘stlik” ordeniga sazovor bo‘ldi.
