“Biznesni boshlash yoshga bog‘liq emas”. 83 so‘mlik oylikdan multimillionerga aylangan Valijon Solihov va ERMAK imperiyasi
Sovet muhandisligidan tadbirkorlikka
Toshkentda matematika o‘qituvchisi oilasida tug‘ilgan Solihovda aniq fanlar va mantiqiy fikrlash muhiti bolalikdan shakllandi. Toshkent irrigatsiya va qishloq xo‘jaligini mexanizatsiyalashtirish muhandislari institutini tamomlagach, u qurilish boshqarmasida ish boshladi. Solihov ilk maoshi 83 so‘m bo‘lganini xotirlaydi.
U deyarli 20 yil davomida qurilish tizimida muhandis bo‘lib ishladi. 1991-yilda Sovet Ittifoqi yemirilgach, 41 yoshli Solihov to‘plangan hayotiy va professional tajribasini yangi sohada qo‘llashga qaror qildi.
Uch kishilik jamoadan sanoat gigantigacha
1992-yilda Solihov 3 nafar xodim bilan kichik xonada oziq-ovqat ishlab chiqarish biznesiga asos soldi. Shunday qilib, bugungi “ERMAK” brendi shakllana boshladi. “Ermak” yagona brendi ostida ishlaydigan korxonalar – “Zafarxon”, “Ermak Plus”, “Zafarxon Plus” snek mahsulotlarini ishlab chiqarish sohasida faoliyat yurituvchi korxonalar bo‘lib, ushbu sohada O‘zbekistondagi eng yirik kompaniya hisoblanadi.
Bugungi kunda korxona faoliyatini tashkil etish, xalqaro standartlar talablarining eng yuqori darajasiga to‘liq javob beradi. Yillik aylanmasi 125 mlrd so‘mni tashkil etadi
1996-yil O‘zbekistonda birinchi marta zavod sharoitida qayta ishlangan va qadoqlangan kungaboqar urug‘lari bozorga chiqarildi. Ungacha urug‘lar faqat ko‘chada, qog‘oz xaltachalarda sotilardi.
2008-yil kompaniya an’anaviy milliy mahsulot – qurtni sanoat miqyosida ishlab chiqarishni yo‘lga qo‘ydi.
“Oziq-ovqat ishlab chiqarish – bu murakkab va mas’uliyatli jarayon. Bugun ishlab chiqarilgan va qadoqlangan ERMAK qurti ertaga bir bola tomonidan yeyiladi. Balki bu mening o‘g‘lim yoki nabiram bo‘lishi mumkin. Shuning uchun men va kompaniyamizning har bir xodimi mahsulot ishlab chiqarishda o‘zimiz va farzandlarimiz haqida o‘ylaymiz”, Valijon Solihov.
Kompaniyada bugungi kunda 750 dan ortiq xodim mehnat qiladi (30 yil avval bu ko‘rsatkich atigi 3 ta edi), 6 ta ishlab chiqarish maydoni va Turkiyada zamonaviy zavodi mavjud. BAA va Janubiy Koreyada vakolatxonalari ochilgan bo‘lib, mahsulotlar 20 ga yaqin mamlakatga eksport qilinadi.
Kompaniyaning muvaffaqiyati va markazlashgan rejalashtirishdan bozor iqtisodiyotiga o‘tish davridagi tajribasi xalqaro ilmiy doiralarda ham e’tirof etilib, “Springer Nature” noshirlik uyi tomonidan maxsus ilmiy tadqiqot sifatida nashr etilgan.
Boshqaruv falsafasi va stol tennisi
Valijon Solihov uchun stol tennisi shunchaki sevimli mashg‘ulot emas, balki kompaniyadagi korporativ boshqaruv va rivojlanishning asosiy elementidir.
“Stol tennisi rivojlanishimning asosi hisoblanadi. Chunki bu yerda sizda ham jismoniy, ham bosh miya harakati ishlaydi. Biz hozir kompaniyamizda xodimlarni majburiy tennisga olib boramiz ham”, degan Valijon Solihov intervyularidan birida.
Tadbirkorning ta’kidlashicha, ushbu sport turi tezkor qaror qabul qilish, raqib strategiyasini o‘qish va doimiy diqqatni jamlashni talab etadi. Shu sababli tennis kompaniya ichidagi jamoaviy ruhiyat va intizomni ushlab turuvchi vosita sifatida qo‘llaniladi.
Qolaversa, 2024-yilda “Faol tadbirkor” ko‘krak nishoni bilan taqdirlangan Valijon Solihov O‘zbekiston Respublikasi Prezidentining kichik va o‘rta biznesning iqtisodiyotdagi o‘rnini oshirish chora-tadbirlari to‘g‘risidagi farmoniga muvofiq tuzilgan “chempion tadbirkorlar”dan biri.
Valijon Solihovning o‘zi ham biznesni boshlashda yosh cheklovi yo‘qligini va to‘g‘ri tanlangan oddiy mahsulot hamda qat’iy intizom orqali xalqaro darajadagi brend yaratish mumkinligini ta’kidlaydi.
Ochiq manbalar asosida Abdurahmon Ergashev tayyorladi
