O‘zbekistonda birinchi qavatdagi kvartiralardan biznes uchun foydalanish tartibi soddalashtirilmoqda
O‘zbekistonda ko‘p qavatli uylarning birinchi qavatidagi kvartiralarni noturar joy toifasiga o‘tkazmasdan savdo va xizmat ko‘rsatish maqsadlarida foydalanishga ruxsat berish taklif etilmoqda.Bu haqda prezident Shavkat Mirziyoyev hududlarda aholi bandligi va daromadini oshirish borasida amalga oshirilayotgan ishlar yuzasidan kengaytirilgan yigʻilishda so‘z bordi.
Yig‘ilishda aholi bandligini oshirishda servis sohasining imkoniyatlari ham muhokama qilindi. Koʻp qavatli uylarning birinchi qavatida sartaroshxona, goʻzallik saloni, kichik doʻkon, atelye, poyabzal va maishiy texnika ustaxonasi kabi odamlarga qulay xizmat turlarini tashkil etish mumkin. Biroq amalda xonadonni noturar joyga oʻtkazish uchun ortiqcha tartiblar va ruxsatlar talab etiladi.
Shu bois, koʻp kvartirali uylarning birinchi qavatidagi xonadonlarni noturar joy toifasiga oʻtkazmasdan, savdo va servis faoliyatiga moslashtirishga ruxsat berish taklif etildi. Bunda xabardor qilishning oʻzi yetarli boʻladi.
Mutasaddilarga bir oy muddatda bunday xonadonlarda tashkil etilishi mumkin boʻlgan xizmat turlari roʻyxati va xavfsizlik talablarini ishlab chiqish topshirildi.
