Bank of Georgia egalari O‘zbekistondagi top-5 banklardan birini sotib olmoqchi
Lion Finance Group bosh direktori Archil Gachechiladzening Bloomberg nashriga ma’lum qilishicha, moliya guruhi mintaqadagi kichik banklarga umuman qiziqish bildirmayapti. Kompaniya e’tiborini asosan aktivlari hajmi bo‘yicha top-3 va top-5 talikka kiruvchi yirik moliya muassasalariga qaratgan. Maqsad – Bank of Georgia’da muvaffaqiyatli qo‘llanilgan zamonaviy raqamli banking modelini Markaziy Osiyo bozorida ham joriy etishdan iborat.
Markaziy bankning 2026-yil 1-iyul holatidagi ko‘rsatkichlariga ko‘ra, O‘zbekiston banking tizimidagi eng yirik beshtalikka O‘zmilliybank, Agrobank, SQB, Kapitalbank hamda Asakabank kiradi. Ushbu besh muassasaning umumiy aktivlari qariyb 498,7 trillion so‘mni tashkil etib, mamlakat bank tizimi jami aktivlarining yarmini egallaydi. Biroq Gruziya xoldingi aynan qaysi bankni nishonga olgani hozircha ochiqlanmagan.
London fond birjasida o‘z aksiyalariga ega bo‘lgan Britaniyaning Lion Finance Group xoldingi Markaziy Osiyodan tashqari Boltiqbo‘yi va Bolqon mamlakatlarida ham bank aktivlarini sotib olishni rejalashtirmoqda. Xolding 2024-yilda Armanistonning Ameriabankini xarid qilgan edi va ushbu aktiv hozirda guruhning umumiy kapitalida salmoqli o‘rin tutadi.
Avvalroq Ozarbayjon Xalqaro banki (ABB) O‘zbekistonning xususiy “Davr Bank” tijorat bankidagi nazorat ulushini sotib olgan edi.
