Ayol taksichilar 10 foizga ko‘paydi. Soliq qo‘mitasi tarmoqlardagi shov-shuvni rad etdi
Soliq idorasi axborotiga ko‘ra, ijtimoiy tarmoqlardagi tahlillarda umumiy ro‘yxatdan o‘tganlar va amalda agregatorlar orqali ishlayotganlar raqamlari aralashtirib yuborilgan. Statistik ma’lumotlarga ko‘ra, yo‘lovchi tashish sohasida o‘zini o‘zi band qilgan fuqarolarning umumiy soni 782,5 ming nafarga yetib, o‘tgan yilga nisbatan 5 mingtaga ko‘paygan. Agregatorlar orqali qatnayotganlar ko‘rsatkichida esa atigi 32 ta kishilik farq kuzatilgan, xolos.
Sohada ayol haydovchilar ulushi ham sezilarli darajada oshgan. 2026-yilning dastlabki 8 oyida rulga o‘tirgan ayollar soni 4 107 nafarga yetib, o‘tgan yilning mos davri bilan solishtirganda 10 foizga (354 nafarga) ko‘paygan. Bu esa taksi xizmatlari bozoriga xotin-qizlarning qiziqishi ortib borayotganini ko‘rsatadi.
Shuningdek, yo‘lovchi tashish bo‘yicha umumiy daromad va buyurtmalar hajmi ham o‘sishni ko‘rsatmoqda. Yil boshidan beri 7 trillion 168 milliard so‘mlik 329 milliondan ziyod safar amalga oshirildi. O‘tgan yilga nisbatan qatnovlar soni 9 foizga, ularning umumiy moliyaviy qiymati esa 23 foizga oshgani qayd etildi. Soliq qo‘mitasi yil yakuniga qadar ushbu ko‘rsatkichlar yanada yuksalishini kutmoqda.
Avvalroq O‘zbekistonda taksichilar 8 oyda 7 trillion so‘mdan ko‘p pul ishlagani xabar qilingan edi.
