AQSh O‘zbekistonni Xitoy tovarlari bojlarni chetlab o‘tishi mumkin bo‘lgan xavfli hududlar ro‘yxatiga kiritdi
Vashington tahlilchilariga ko‘ra, O‘zbekiston va Qozog‘iston Xitoy uchun kichik va imkoniyatli nishonlar toifasiga mansub deb topilgan. Mamlakatdagi erkin iqtisodiy zonalar, bojxona omborlari hamda arzon ishchi kuchi Xitoy eksportchilariga tovarlarni uchinchi davlat orqali qayta yo‘naltirish, ya’ni hujjatlarni o‘zgartirish yoki minimal qadoqlash orqali AQSh bojlaridan qochish imkonini berishi ko‘rsatilgan.
Hisobotda keltirilishicha, bu kabi noqonuniy savdo sxemalarining yillik hajmi o‘rtacha 75 milliard dollarni tashkil etadi va bu AQSh byudjetiga 19-26 milliard dollar atrofida zarar keltirmoqda. Vaziyatga qarshi kurashish uchun Amerika tomoni sun’iy intellektga asoslangan “Detective Border” tizimini ishga tushirdi. Ushbu tizim yuklarning harakatlanish tarixi va ishlab chiqarish quvvatlarini tahlil qilish orqali shubhali tovar oqimlarini aniqlaydi.
Hujjatda O‘zbekiston hukumati noqonuniy tranzitda bevosita ayblanmagan va bu holat avtomatik ravishda sanksiya joriy etilishini anglatmaydi. Biroq, bu xavf AQSh va O‘zbekiston o‘rtasidagi yangi savdo-investitsiyaviy kelishuvlar bo‘yicha muzokaralar ketayotgan bir paytda o‘zbek eksport mahsulotlari ustidan nazorat sezilarli kuchayishini anglatadi.
