AQSH davlat kotibi Marko Rubio 100 dan ortiq yirik kompaniya vakillari bilan Samarqandga keladi
AQSHning Janubiy va Markaziy Osiyo bo‘yicha maxsus vakili Sergio Gor bayonotiga ko‘ra, tashrif doirasida Samarqandda “C5+1” formatidagi navbatdagi vazirlar uchrashuvi bo‘lib o‘tadi. Unda Rubio O‘zbekiston, Qozog‘iston, Qirg‘iziston, Tojikiston va Turkmaniston tashqi ishlar vazirlari bilan iqtisodiy bog‘liqlikni kengaytirish, energetika xavfsizligi hamda mintaqaviy hamkorlik masalalarini muhokama qiladi.
Shuningdek, Amerika delegatsiyasi rahbari O‘zbekiston rahbariyati bilan alohida ikkitomonlama muzokaralar o‘tkazishi rejalashtirilgan. Uchrashuvlarda xususiy sektor investitsiyalarini jalb etish, o‘zaro savdo hajmining oshishi va iqtisodiyot tarmoqlarini modernizatsiya qilish bo‘yicha amaliy qadamlar ko‘rib chiqiladi.
Eslatib o‘tamiz, 2026-yilning aprel oyida Vashington shahrida Amerika–O‘zbekiston biznes va investitsiya kengashi rasman o‘z faoliyatini boshlagan edi. O‘shanda Prezident Administratsiyasi rahbari Saida Mirziyoyeva hamda Marko Rubio ikki tomonlama savdo-iqtisodiy va sarmoyaviy aloqalarni rivojlantirish istiqbollarini muhokama qilgan edi.
