Anomal issiq sabab Qashqadaryoda ham og‘ir yuk mashinalari harakati cheklanadi
Gidrometeorologiya xizmati ma’lumotlariga ko‘ra, viloyatda kunduzi havo harorati +42...+44 darajagacha va undan ham yuqoriga ko‘tarilmoqda. Bunday issiqda asfalt qoplamasi +70...+75 darajagacha qizib, og‘ir yuk ko‘tarish qobiliyati pasayadi va yo‘llarda g‘ildirak izlari hamda turli deformatsiyalar yuzaga kelishi mumkin.
Shu sababli, “Yo‘l harakati to‘g‘risida”gi qonunning 15 va 23-moddalari hamda “Avtomobil yo‘llari to‘g‘risida”gi qonunning 16-moddasiga muvofiq, Qarshi shahri, tuman markazlari va ularni bog‘lovchi umumiy foydalanishdagi yo‘llarda og‘ir yuk avtomobillarining harakati har kuni soat 09:00 dan 19:00 gacha vaqtincha cheklanadi. Haydovchilar va yuk tashuvchi korxonalardan yuk tashish vaqtlarini ushbu cheklovlarga mos ravishda rejalashtirish so‘ralgan.
Avvalroq xuddi shunday cheklov anomal issiq tufayli Surxondaryo viloyatida ham joriy etilgan edi.
