Andijonda $39 ming evaziga yer olib berishni va’da qilgan shaxslar ushlandi
Andijon viloyati Marhamat tumanida bank xizmatlari markazlaridan birining boshlig‘i va “Norin-Qoradaryo” irrigatsiya tizimlari havza boshqarmasi mashinisti yer maydonini rasmiylashtirib berishni va’da qilib, 39 ming dollar miqdorda pul talab qilgani aniqlandi. Bu ahqda Davlat xavfsizlik xizmati xabar berdi.
Ma’lum qilinishicha, ular 37 yoshli fuqaroning ishonchiga kirib, Marhamat tumani hokimligi zaxirasidagi 24 sotix yer maydoni go‘yoki turar-joy toifasiga oid hujjatlarga ega ekanini aytgan. Shuningdek, mansabdor tanishlari orqali ushbu yer uchastkasini kelgusida fuqaro nomiga rasmiylashtirib berish evaziga 39 ming AQSH dollari talab qilgan.
Davlat xavfsizlik xizmati, Iqtisodiy jinoyatlarga qarshi kurashish departamenti hamda Ichki ishlar organlari xodimlari hamkorligida o‘tkazilgan tezkor tadbirda boshqarma mashinisti oldindan 25 ming AQSH dollarini olgan vaqtida ashyoviy dalillar bilan ushlandi.
Mazkur holat yuzasidan gumonlanuvchilarga nisbatan jinoyat ishi qo‘zg‘atilgan. Hozirda tergov harakatlari olib borilmoqda.
