“Andijon polka” raqsini Ginnesga kiritish uchun byudjetdan 730 mln so‘m sartflandi
Andijon viloyati hokimi 2026-yil 22-iyulda qabul qilgan qarorga ko‘ra, viloyat budjetining 2026-yilgi zaxira jamg‘armasi hisobidan 730 million so‘m mablag‘ ajratildi. Bu haqda Andijon viloyati hokimining “Viloyat byudjetining 2026 yil zaxira jamg‘armasi mablag‘lari hisobidan mablag‘lar ajratish to‘g‘risida”gi qarorida keltirilgan.
Mazkur mablag‘ Andijon viloyati Madaniyat boshqarmasiga “Andijon polka” raqsini Ginnes rekordlar kitobiga kiritish bilan bog‘liq xarajatlarni qoplash uchun yo‘naltirilgan.
Qarorda viloyat Iqtisodiyot va moliya boshqarmasiga xarajatlar rejasiga tegishli o‘zgartirishlarni kiritish, G‘aznachilik xizmati boshqarmasiga esa mablag‘larning belgilangan tartibda moliyalashtirilishini ta’minlash topshirilgan.
Shuningdek, ajratilgan mablag‘lardan maqsadli va samarali foydalanish viloyat Madaniyat boshqarmasi zimmasiga yuklatilgan. Qaror ijrosini nazorat qilish viloyat hokimining birinchi o‘rinbosari Akmal To‘lanov zimmasiga topshirilgan.
Eslatib o‘tamiz, avvalroq Andijondagi “Bobur arena” stadionida 20 ming kishi bir vaqtda “Andijon polkasi” raqsini ijro etib, Ginnes rekordini o‘rnatilgandi. Biroq tadbir arafasida, 23-iyun kuni unga yo‘l olgan o‘quvchilar ketayotgan Damas avtohalokatga uchradi. Oqibatda bir nafar o‘quvchi vafot etdi, yana bir necha kishi shifoxonaga yotqizildi.
