Andijon aeroporti o‘z tarixida ilk bor ulkan Boeing 747 samolyotini qabul qildi. Unga nasldor qoramollar yuklangan
Lyej shahridan uchib kelgan ushbu reys bortida sut va go‘sht yo‘nalishidagi 160 boshdan ortiq simmental va golshtin zotli sigirlar olib kelindi. Aeroportda mutaxassislar barcha veterinariya va biologik xavfsizlik ko‘rigini o‘tkazgach, hayvonlar rejalashtirilgan manzilga yetkazildi.
“Uzbekistan Airports” vakillarining bildirishicha, ushbu hodisa aeroportning yirik xalqaro yuklarni hamda tirik hayvonlarni qabul qilish bo‘yicha texnik imkoniyatlarini namoyon etdi.
Ushbu mahsulot va nasldor mollarning olib kelinishi davlat rahbari tomonidan oziq-ovqat zaxirasini boyitish hamda go‘sht narxini barqaror ushlash borasida berilgan topshiriqlar ijrosi doirasida amalga oshirilmoqda.
