Aliyev O‘zbekistonga keldi. Toshkentda Ozarbayjon bilan navbatdagi sammit boshlanmoqda
“Toshkent-Humo” xalqaro aeroportida Ozarbayjon yetakchisini shaxsan O‘zbekiston Prezidenti Shavkat Mirziyoyev va uning rafiqasi tantanali ravishda kutib olgan. Ikki davlat bayroqlari ko‘tarilgan munosabat bilan oliy martabali mehmon sharafiga faxriy qorovul saf tortgan.
Tashrifning asosiy voqealari 23-avgust kuniga belgilangan bo‘lib, unda ikki mamlakat yetakchilari oliy darajadagi rasmiy muzokaralar hamda Oliy davlatlararo kengashning navbatdagi uchinchi yig‘ilishini o‘tkazadi.
Muzokaralar yakunida ikki tomonlama munosabatlarni yangi bosqichga olib chiquvchi bir qator muhim hujjatlar imzolanishi, shuningdek, strategik hamkorlikni rivojlantirishga qaratilgan qator iqtisodiy va gumanitar loyihalarga rasman start berilishi ko‘zda tutilgan.
Avvalroq, Ozarbayjon rahbari tashrif oldidan O‘zbekiston OAVlariga keng ko‘lamli intervyu bergan edi.
