7 yil davomida davolangan Qizil kitobdagi bo‘z echkemar tabiatga qo‘yib yuborildi
Samarqand viloyatining Nurobod tumanida yetti yil davomida reabilitatsiya markazida parvarish qilinib, davolangan Qizil kitobga kiritilgan bo‘z echkemar yana tabiiy yashash muhitiga qo‘yib yuborildi. Bu haqda Ekologiya va iqlim o‘zgarishi milliy qo‘mitasi Samarqand viloyati bosh boshqarmasi xabar berdi.
Mutaxassislarning ma’lum qildiki, bo‘z echkemar bir necha yil avval Nurobod cho‘l hududida yarador va yosh holatda topilgan. Shundan so‘ng u nazorat olinib, reabilitatsiya markaziga olib ketilgan va yetti yil davomida davolangan.
Hayvonning oyog‘i va dumi to‘liq tiklangani, sog‘lig‘i me’yorga kelgani sababli uni yana tabiat bag‘riga qaytarishga qaror qilgan. Bo‘z echkemar Nurobod tumanidagi Qarnob cho‘lining dasht hududiga qo‘yib yuborildi. Bu yerda uning asosiy ozuqasi bo‘lgan kemiruvchilar uchraydi hamda u o‘z inini topib, tabiiy hayotini davom ettirishi mumkin.
Bo‘z echkemar O‘zbekiston Respublikasi Qizil kitobiga kiritilgan noyob sudralib yuruvchilardan biri hisoblanadi. U Janubiy Orolbo‘yidan Farg‘ona vodiysigacha bo‘lgan cho‘l va yarim cho‘l hududlarida uchraydi. O‘zbekistondan tashqarida esa O‘rta Osiyo, Janubiy Qozog‘iston, Afg‘oniston, Eron, Janubi-g‘arbiy Osiyo, Shimoliy Afrika, Hindiston va Pokistonda uning boshqa kenja turlari tarqalgan.
Mutaxassislar ma’lumotiga ko‘ra, 1990-yillar boshida bo‘z echkemarlarning umumiy soni qariyb 45 ming boshni tashkil etgan bo‘lsa, Farg‘ona populyatsiyasida 200 ga yaqin individ qayd etilgan. Hozirga kelib esa turning aksariyat yashash joylarida yo‘qolib ketgani, qolgan hududlarda esa juda kam sonli saqlanib qolgani ta’kidlanadi.
