560 mingdan ortiq ehtiyojmand oilaga 92 milliard so‘mlik energiya kompensatsiyasi to‘lab berildi
Ijtimoiy himoya milliy agentligi ma’lum qiladiki, ijtimoiy himoya tizimi doirasida ajratilgan umumiy kompensatsiyaning 51,43 milliard so‘mi elektr energiyasi, 40,7 milliard so‘mi esa tabiiy gaz xarajatlarini qoplash uchun yo‘naltirilgan. To‘lovlar davlat rahbari qaroriga muvofiq, ehtiyojmand oilalarni energetika tariflari oshishi sharoitida qo‘llab-quvvatlash va ularning moliyaviy yukini yengillashtirish maqsadida berilmoqda.
Kompensatsiya to‘lash tartibi energiya resurslarining bazaviy me’yori hamda undan oshgan narxlar o‘rtasidagi tafovutni davlat hisobidan qoplash prinsiplari bo‘yicha amalga oshirilmoqda. Bu orqali kam ta’minlangan xonadonlarning isitish va elektr energiyasiga bo‘lgan ehtiyojlari uchun qo‘shimcha imtiyozlar ta’minlanmoqda.
Bildirilishicha, ushbu ijtimoiy yordamni olish tartibi hamda shartlari bo‘yicha fuqarolar mahallalardagi ijtimoiy xodimlarga, tumanlardagi “Inson” ijtimoiy xizmatlar markazlariga yoki 1140 qisqa raqamli ishonch telefoniga murojaat qilishlari mumkin.
