2027-yildan onalarga bola bir yoshga to‘lgungacha nafaqa berish joriy qilinadi
O‘zbekistonda 2027-yil 1-yanvardan mehnat shartnomasi asosida ishlayotgan xotin-qizlarni ijtimoiy qo‘llab-quvvatlashning yangi tartibi kuchga kiradi. Unga ko‘ra, ayollarga homiladorlik va tug‘ish ta’tili yakunlanganidan keyin farzandi bir yoshga to‘lguniga qadar bolani parvarishlash nafaqasi to‘lab boriladi.
Mazkur tartib prezident tomonidan 11-sentyabr kuni imzolangan PF-193-sonli farmonda belgilangan. Hujjatga muvofiq, bolani parvarishlash nafaqasi Davlat ijtimoiy sug‘urta jamg‘armasi mablag‘lari hisobidan to‘lanadi.
Ishlayotgan onalarga farzandi bir yoshga yetguniga qadar Ijtimoiy sug‘urta jamg‘armasidan nafaqa berilishi rejalashtirilayotgani avvalroq, 3-sentyabr kuni ma’lum qilingan edi. Bu masala kambag‘allikni qisqartirish va aholi daromadlarini oshirish bo‘yicha ishlarni yangi bosqichga olib chiqishga bag‘ishlangan yig‘ilishda muhokama qilingan. Unda davlat rahbari ehtiyojmand oilalarning ijtimoiy himoyasini kuchaytirish bo‘yicha yangi yondashuvlarni belgilab bergan.
Farmonda ijtimoiy yordam tizimiga oid boshqa qator o‘zgarishlar ham nazarda tutilgan. Xususan, “Saxovat va ko‘mak”, “Ayollar daftari” hamda “Yoshlar daftari” jamg‘armalari saqlab qolinadi. Shu bilan birga, ushbu jamg‘armalar mablag‘larini tasarruf etish, ular hisobidan aholiga ijtimoiy yordam va xizmatlar ko‘rsatishni tashkil qilish vakolatlari shtablarga o‘tkaziladi.
