2016-yildan beri 25 339 kishi O‘zbekiston fuqaroligini oldi
2016-yil dekabridan buyon 25 339 nafar fuqaroligi bo‘lmagan shaxs O‘zbekistonda fuqaroligiga qabul qilingan. Bu haqda Ichki ishlar vazirligi huzuridagi Migratsiya va personallashtirish departamenti ma'lum qildi.
Qayd etilishicha, ushbu davrda O‘zbekiston prezidentining 117 ta farmoni asosida fuqaroligi bo‘lmagan shaxslarning fuqarolikka qabul qilinishi amalga oshirilgan.
Bundan tashqari, 2020-yildan boshlab mamlakatda doimiy yashovchi fuqaroligi bo‘lmagan shaxslarning O‘zbekiston fuqaroligini tan olish tartibi joriy etilgan. Shu asosda 2020-yildan 2026-yilning o‘tgan davrigacha 66 189 nafar shaxsning hujjatlari ko‘rib chiqilib, ularga O‘zbekiston fuqarosining pasporti yoki ID-kartasi rasmiylashtirilgan.
Ularning 24 456 nafari 1995-yil 1-yanvargacha O‘zbekistonga ko‘chib kelib, doimiy ro‘yxatdan o‘tgan shaxslar hisoblanadi. Yana 22 692 nafar fuqaro 2005-yil 1-yanvargacha mamlakatga ko‘chib kelgan, doimiy yashash joyi bo‘yicha ro‘yxatga olingan va ilgari boshqa davlat fuqaroligida bo‘lmagan.
Shuningdek, O‘zbekistonda kamida 15 yil doimiy yashagan hamda shu davrda boshqa davlat fuqaroligiga ega bo‘lmagan shaxslar, shuningdek, ota-onasidan biri O‘zbekiston fuqarosi deb tan olingan va boshqa davlat fuqaroligini qabul qilmagan bolalarning murojaatlari asosida 19 041 kishining hujjatlari rasmiylashtirilgan.
Hozirda O‘zbekiston fuqaroligini olish istagidagi 1 795 nafar shaxsning murojaatlari ko‘rib chiqilmoqda. Ularning 401 nafari fuqarolikni tan olish bo‘yicha murojaat qilgan.
