186 milliardlik talon-toroj. IIV sobiq o‘rinbosari va yana 29 kishi sud qilinadi
Sud materiallariga ko‘ra, IIV Jamoat xavfsizligi departamentining sobiq boshlig‘i Bekmurod Abdullayev Jinoyat kodeksining 167-moddasi 3-qismi (juda ko‘p miqdorda o‘zlashtirish yoki rastrata yo‘li bilan talon-toroj qilish) bo‘yicha ayblanmoqda. U bilan birga ish bo‘yicha jami 30 nafar shaxs sud qilinadi.
Sudlanuvchilar orasida Hoshim Yo‘ldoshev, Jahongir Qurbonov va Dilshod Tashev kabi sobiq mansabdorlar ham bor. Ularga o‘zlashtirish, mansab vakolatini suiiste’mol qilish, mansab soxtakorligi hamda jinoiy daromadlarni legallashtirish kabi bir qator ayblovlar qo‘yilgan.
B. Abdullayev 2021-yil aprel oyida vazir o‘rinbosari etib tayinlangan va 2025-yil noyabrida lavozimidan olingan edi. 2026-yil yanvarida esa IIV tizimidagi davlat xaridlarida 186 milliard so‘m poymol qilingani aniqlanib, sobiq vazir o‘rinbosari va departament boshlig‘i Rustam Tursunov qamoqqa olingan edi.
