17,2 foiz elektr va 7,6 foiz gaz. O‘zbekiston energetikasidagi olti oylik yo‘qotishlar ochiqlandi
Prezident Shavkat Mirziyoyev raisligida o‘tkazilgan videoselektor yig‘ilishida energetika tarmog‘idagi ko‘rsatkichlar va yo‘qotishlar tahlil qilindi.
Qayd etiladiki, olti oyda elektr energiyasi yo‘qotishi 17,2 foizni (4,8 milliard kilovatt-soat), gaz tarmog‘idagi yo‘qotishlar esa 7,6 foizni (797 million kub metr) tashkil etdi. Tarmoqlardagi ushbu yo‘qotishlarni kamaytirish va daromadni oshirish bo‘yicha ko‘rilayotgan choralar yetarsiz deb topilgan.
Shuningdek, “Hududiy gaz tarmoqlari” korxonalarida mehnat unumdorligi qo‘shni mamlakatlarga nisbatan 1,5–2 barobar pastligi ta’kidlandi. Sohani rivojlantirish va energetika infratuzilmasini modernizatsiya qilish uchun kelgusi o‘n yilda 8 milliard dollar mablag‘ talab etiladi.
“Franklin Templeton” tahlillariga ko‘ra, to‘g‘ri boshqaruv va islohotlar orqali “Hududiy elektr tarmoqlari”ning bozor qiymatini 2 barobarga oshirish imkoniyati mavjud.
