1-avgustdan jarima maydonchasidan avtomobilni chiqarish uchun QR-kodli ruxsatnoma talab qilinadi
Hukumatning 6-iyuldagi 358-sonli qaroriga muvofiq, 2026-yil 1-avgustdan boshlab transport vositalarini saqlash joylaridan chiqarish tartibi o‘zgaradi. Endilikda ruxsatnoma ma’muriy ishni ko‘rib chiquvchi va ijro organi tomonidan “Jarima maydonchasi” axborot tizimida elektron shakllantirilib, faqat QR-kod orqali tasdiqlanadi.
Ichki ishlar vazirligi ikki oy muddatda “Jarima maydonchasi” tizimini Soliq qo‘mitasi va Raqamli texnologiyalar vazirligi bazalari bilan integratsiya qiladi.
Jarima maydonchasi ko‘rsatgan xizmatlar, avtotransport markasi, davlat raqami, kirgan-chiqqan vaqti va undirilgan to‘lovlar soliq organlari tizimida avtomatik ravishda aks etadi.
Ko‘rsatilgan xizmatlar va to‘lovlarni “Jarima maydonchasi” tizimi orqali yuritmaslik BHMning 20 baravari miqdorida jarima solishga sabab bo‘ladi.
Transport vositasini ushlab turish sabablari bartaraf etilmay turib chiqarib yuborish yoki undan noqonuniy foydalanish ham shunday miqdorda jarimaga tortiladi.
Ushbu qonunbuzarliklar bir yil davomida takroran sodir etilsa, jarima maydonchasi faoliyatini yurituvchi yuridik shaxs bilan tuzilgan shartnoma bekor qilinadi.
Soliq qo‘mitasi va Markaziy bank uch oy muddatda bozorlar hamda ularga tutash hududlardagi avtoturargohlarda to‘lovlarni yagona QR-kod (UzQR) orqali amalga oshirish tizimini yaratadi.
Bundan tashqari, mamlakatda 2026-yil 1-oktyabrgacha “E-bozor” yagona raqamli platformasi sinov tariqasida, 2027-yil 1-martgacha esa to‘liq ishga tushirilishi belgilangan.
