Toshkentda yuz bergan mudhish YTHda mototsikl haydovchisi halok bo‘ldi
Toshkent shahar IIBB YHXB bergan ma’lumotlarga ko‘ra, ko‘ngilsiz hodisa 25-sentyabr kuni soat 22:45 atrofida Kichik halqa avtomobil yo‘lining 83-maktab ro‘parasidan o‘tgan qismida qayd etilgan. 2005-yilda tug‘ilgan J.Sh. mototransport vositasida harakatlanib borayotib, oraliq masofani yetarlicha saqlamagan va o‘zi bilan bir yo‘nalishda ketayotgan GAZ-5312 yuk avtomobilining orqa qismiga borib urilgan.
Zarba oqibatida boshqaruvni yo‘qotgan mototsikl qarama-qarshi bo‘lingan yo‘nalishga chiqib ketgan va qarshisidan kelayotgan KIA K5 yengil avtomobili bilan to‘qnashgan. Olingan og‘ir tan jarohatlari sababli mototsikl haydovchisiga voqea joyida va shifoxonada zudlik bilan tibbiy yordam ko‘rsatilganiga qaramay, u reanimatsiya bo‘limida vafot etgan.
Ayni paytda ushbu YTH yuzasidan Mirobod tumani mas’ul xodimlari tomonidan surishtiruv va dastlabki tergov harakatlari olib borilmoqda. Yo‘l harakati xavfsizligi xizmati barcha haydovchilardan yo‘llarda belgilangan tezlik me’yorlariga va xavfsiz oraliq masofaga qat’iy rioya qilishni so‘raydi.
