Toshkentda olti oyda YTHlar va jarohatlanganlar soni qisqarganiga qaramay, halok bo‘lganlar soni o‘zgarmay qoldi
YTHlarda jarohat olganlar soni ham 10 foizga qisqarib, 394 nafarni tashkil etdi. Biroq eng achinarli ko‘rsatkich – avariyalardagi o‘lim holati o‘zgarmadi va 26 kishi hayotdan ko‘z yumdi.
IIBB ma’lumotlariga ko‘ra, sodir bo‘lgan hodisalarning asosiy qismi, ya’ni 355 tasi piyodalar va 116 tasi bolalar ishtirokida yuz bergan. Bu ko‘rsatkich shaharda piyodalar xavfsizligi hanuz dolzarb muammo bo‘lib qolayotganini ko‘rsatadi. Shu bilan birga, svetoforning taqiqlovchi signalidan o‘tish, tezlikni oshirish hamda quvib o‘tish qoidalarini buzish bilan bog‘liq og‘ir avariyalar soni qariyb ikki barobarga kamaydi.
Poytaxtda “Xavfsiz va qulay yo‘l” dasturi doirasida infratuzilmani modernizatsiya qilish davom etmoqda. Yuzlab chorrahalarga intellektual svetoforlar o‘rnatilib, transport harakati tezlashtirilgan bo‘lsa-da, mutaxassislar asosan piyodalar infratuzilmasini va trotuarlar holatini yaxshilash, maktablar yaqinida tezlikni tushirish choralarini kuchaytirish zarurligini ta’kidlamoqda.
