Toshkentda 1-oktabrdan avtobus va metroda yo‘l haqi 2500 so‘mga oshiriladi
Toshkentda 2026-yil 1-oktabrdan avtobus va metroda elektron to‘lov orqali bir martalik qatnov narxi 2500 so‘m etib belgilanadi. Naqd puldagi yo‘l haqi esa 3000 so‘mligicha qoladi. Bu haqda xalq deputatlari Toshkent shahri Kengashining 25-sentabrdagi “Toshkent shahridagi jamoat transportida yo‘lkira haqi tarifini belgilash to‘g‘risida”gi qarorida belgilandi.
Qarorga ko‘ra, bir yo‘lovchining bagajini tashish narxi 4000 so‘mni tashkil etadi. Belgilangan barcha tariflarga QQS kiritilgan.
Transport kartalari uchun tarif rejalari ham tasdiqlandi. Jumladan, avtobusda foydalanish uchun bir oylik tarif 250 ming so‘m, avtobus va metro uchun esa 345 ming so‘m etib belgilangan. Shuningdek, 10 martalik safarlar paketi 19 ming so‘m, 20 martaligi 38 500 so‘m, 30 martaligi 57 500 so‘m bo‘ladi.
Transport kartasi bilan bir soat ichida avtobusdan boshqa avtobusga o‘tilganda birinchi qatnov uchun 2500 so‘m, ikkinchisi uchun 1500 so‘m undiriladi. Uchinchi va keyingi avtobuslardagi qatnovlar bepul bo‘ladi. Avtobusdan metroga o‘tilganda esa metrodagi qatnov uchun 1500 so‘m to‘lanadi.
O‘quvchilar, talabalar, nafaqaxo‘rlar hamda nogironligi bo‘lgan shaxslarga tegishli tarif paketlarini xarid qilishda 50 foizlik chegirma qo‘llanadi. Jamoat transportidan bepul foydalanish huquqiga ega shaxslarning amaldagi imtiyozlari saqlanadi.
